Si Nelson Alonto Sarrapudin, el chairman del 1 Agila party-list, ya llama con el de ila mga miembros voluntarios para continua el conducida del mision humanitaria na de ila respetivo comunidades na Zamboanga Peninsula.
Si Sarrapudin, ya hace el llamada durante el convencion regional del 1 Agila party-list del Sabado que ya conduci na Center Podium del edeficio del capitolio provincial na Ipil, Zamboanga Sibugay.
Durante el convencion, ya discuti sila el importancia del “kapit bisig” y un medio ambiente donde el mga gente ta man ayudahan a uno’y otro y resiliente.
“Debe man ayudahan kita para el bien y desarollo de todo,” ya enfatiza si Sarapuddin, quien ya servi serca de tres años como presidente nacional del The Fraternal Order of Eagles-Philippine Eagles.
“Quien pa ba el debe man ayudaha si hinde kita-kita mismo na comunidad,” ya omenta si Sarrapudin, quien un residente del ciudad de Zamboanga.
El Alcaldesa Katrina Cainglet-Balladares del Kabasalan, Zamboanga Sibugay, ya atesta durante el convencion regional cay el Fraternal Order of Eagles que antes ta encabesa si Sarrapudin ya conduci un mision humanitaria na su municipio durante el tiempo de pandemia.
Asegun con Balladares, ya distribui canda Sarrapudin arroz con mga indigentes quien el bien afectao na pandemia.
Del Sabado, mas de 1,000 Zamboanga Sibugaynons desde diferentes municipios y profesiones el voluntariamente ya participa y ya uni na convencion del 1 Agila party-list.
Aquellos quien ya participa y uni na convencion ta inclui 12 organizaciones fraternidad y sororidad desde diferentes municipios del Zamboanga Sibugay.
Si Sarrapudin ya expresa su profundo gratitud por el de ila participation voluntaria na convencion regional. (B. Garcia)