Maga autoridad ya puede aresta con un lider del grupo Abu Sayyaf quien ta esconde por dies años ya cay ta enfrenta le manada asuntos criminal na provincia de Sulu.
Si Coronel Richard Verceles, el operations chief del Area Police Command-Western Mindanao, ya nombra con el arestao lider del grupo Abu Sayyaf como si Ibrahim Asara, 52, un residente del Barangay Kanmindus, Luuk, Sulu.
Asegun con Verceles cay con Asara ya aresta del Huwebes medio dia na un casa adentro del Campo Senior Superintendent Julasirim Kasim na Barangay Asturias, Jolo, Sulu.
Si Verceles ya habla cay si Asara tiene pendiente orden de aresto de seis asuntos de matansa y veinte sinco de frustrated murder sin piansa que ya dale el tribunal del Jolo, Sulu, del Febrero Siete año Dos Mil Dose.
Asegun con Verceles cay si Asara amo el aka segundo lider del grupo Abu Sayyaf que ta encabesa si Radullan Sahiron, el de todo viejo lider del maga bandido base na provincia de Sulu.
Asegun con Verceles cay si Asara envuelto na serye de atrocidad que ta incluwi el kidnaping del negocianta Rosalie Lao del Enero año Dos Mil Ocho na Jolo; kidnapping del anunciadora Ces Oreña-Drilon y su cameraman del ABS-CBN del Hunyo Ocho, Dos Mil Nueve na Maimbung; kidnapping y matansa por medio de cortar pescueso de Gabriel Canizares, el maestro encargao del Kan-Ague Elementary School del Octubre Deci-Nueve, Dos Mil Nueve na Barangay Tanum, Patikul; kidnapping del un capitan and tripulantes del varco de companiya del Mega Fishing del Marso Onse, Dos Mil Onse na Isla de Minis, Hadji Panglima Tahil; kidnapping del un dueño de restaurant, si Nelson Lim, del Hunyo Veinte Dos, Dos Mil Onse, na Patikul; y envuelto tamen si Asara na encuentro contra con maga tropa marino del Hulyo Viente Ocho, Dos Mil Onse na Patikul que ya resulta na muerte de Tiniente Michael Balalad.
Con Asara ya pone bajo el custodiya del Criminal Investigation and Detection Group na provincia de Sulu y ay entrega conele na tribunal del ciudad de Taguig donde ya transferi su maga asuntos criminal. (B. Garcia, photo courtesy of Criminal Investigation and Detection Group 9)