Dos colectora de juego illegal ya aresta maga operativas del Criminal Investigation and Detection Group (CIDG) na provincia del Zamboanga del Sur.
Si Tiniente Coronel Rex Perocho, el hefe del CIDG-Zamboanga del Sur Provincial Field Unit, ya nombra con el maga arestao colectora como canda Minda Largo, cuarenta’y nueve, y si Melody Imbing, cuarenta’y sinco años el edad.
Si Perocho ya habla cay con Largo ya aresta durante el implementacion del Oplan Bolilyo, un campanya contra juego ilegal, maga alas siente deci-seis del Miyercoles de noche na Purok Sili Dos na Barangay Danlugan, ciudad del Pagadian, na provincia del Zamboanga del Sur.
Asegun con Perocho cay con Largo ya cuji na acto ta colecta tayada de un juego ilegal conosido como el “swertres warik-warik” sin el permiso del Philippine Charity Sweepstakes Office.
Con Largo ya confisca na su posesion marka sien pesos sen, lista de tayada, cellphone, portable printer y ballpen.
Si Perocho ya habla cay con Imbing ya aresta maga alas siente cuarenta’y dos del Miyercoles denoche na Purok Mahayahay, Barangay Dao, ciudad de Pagadian na provincia de Zamboanga del Sur.
Con Imbing ya cuji na acto ta colecta tayada despues que ya recivi le tayada desde con un secreta del pulisiya.
Ya recubri na posesion de Imbing tres de veinte pesos coins que ya usa como tayada, maga lista, y ballpen.
Asegun con Perocho cay canda Largo y Imbing ya lleba na CIDG-Zamboanga del Sur Provincial Field Office para el documentacion y propio disposision. (B. Garcia, (photo courtesy of Criminal Investigation and Detection Group 9)