Ya comenda si Tiniente General William Gonzales, el comandante del Western Mindanao Command (Westmincom), con Tiniente Ronnie Liang por su dedicao servicio como un reserva oficial.
Si Gonzales ya expresa su apreciacion por el suporta de Liang con el organizacion del militar por medio del su mga video que ta pone le na plataforma de “social media” ta dale mira el transformacion del diferentes comunidad na jurisdiccion del Westmincom afectao na guerra.
Si Liang, quien hinde ta falla ofrece su libre servicio en momento de necesidad, es un cantor, piloto y reserva oficial del Army.
Como un advocador de paz, si Liang regularmente ya hace su deber como un celebridad reservista.
Si Liang bajo el 16th Regional Community Defense Group que ya encabesa si Coronel Markton Abo.
Del Miercoles tarde, ya hace un visita de cortesia si Liang con Gonzales na quartel del Westmincom adqui na ciudad. (B. Garcia)