Zamboanga: Juego de ROTC hay comensa na Domingo

0
11

El juego del Mindanao leg del Reserve Officer’s Training Corps (ROTC) para este año hay conduci aqui na ciudad de Zamboanga.

Asegun con Dr. Cecil Atilano, el jefe del oficina de deportes del ciudad, el juego del ROTC para este año hay conduci na Joaquin F. Enriquez Memorial Sports Complex principiando na Domingo, Junio 23, y y culmina na Sabado, Junio 29.

Asegun con Atilano, con el actividad de deportes hay participa mas o menos 2,000 atleta-cadetes del diferente Colegio y Universidad aqui na Mindanao.

Si Atilano ya habla, el mga atletas hay competi na mga jeugo del swimming, arnis, athletics, boxing, e-sports, kickboxing, sepak takraw, taekwondo, table tennis, volleyball, basketball, target shooting, chess y competicion de raiders.

Hay conduci tamen el Search for Ms ROTC in Mindanao 2024 como un espcial caracteristica del actividad de deportes.

Asegun con Atilano, el mga visita durante el abrida del juego ta inclui el Senador Robin Padilla y Senador Francis Tolentino y mga oficiales desde’l Depatamento de Defensa Nacional, Commission on Higher Education, y Philippines Sports Commission.

El objetivo del juego de ROTC amo para motiva el desarollo del programa de deportes, promove educacion pisico, fomenta disiplina, colaboracion y excelencia.

El juego de ROTC tiene tamen el objetivo para enseña mga joven atleta para participa na competicion internacional y tamen suplementao con el programa para del mga jovenes.

El conducida del Mindanao-leg del juego de ROTC este año amo el siguiente vez que hay hace aqui na ciudad de Zamboanga. (B. Garcia)

Leave a Reply