Si Police Brigadier General Albert Magno, el director del Explosive Ordnance Demolition (EOD) del policia, y el Alcalde John Dalipe ya reafirma el de ila compromiso para hace mejor esfuerzos na mantencion un segurao y protejido ciudad de Zamboanga.
Ese el cosa ya descuti el dos oficial cuando ya hace visita de cortesia si Magno con Dalipe del Miercoles na City Hall.
El de ila descusion ya man centro na mga nuevo tecnologia como el EOD robot, que puede ayuda na esfuerzo contra terorismo y mantencion de paz.
Si Magno ya informa con Dalipe cay el EOD robot ta forma parte del equipo contra terorismo que ya dona el Estados Unidos con el Philippine National Police (PNP) por medio del grupo del EOD/K9 del otro año.
Meintras tanto, si Dalipe ya reasegura su implacable suporta con el sector de seguridad por medio de logistico ta inclui equipo y transportacion para el seguridad y proteccion del ciudad de Zamboanga. (B. Garcia)