Un “high-value target (HVT)” suspechao el ya aresta mientras otro uno el ya puede escapa na dos separao campaña contra droga ilegal na ciudad de Cotabato y provincia del Maguindanao del Norte.
El Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM) ya nombra con el arestao HVT suspechao como si Marco Abdul Saban, 49 años el edad.
El suspechao quien ya puede escapa ya conose lang por medio del su mga aliases como un tal Datu y Umpie.
Asegun con el PDEA-BARMM, con Saban ya aresta na un “buy-bust operation” na Calle Esteros, Avenida Sinsuat, Barangay Mother Tamontaka, ciudad del Cotabato del Jueves.
Asegun con el PDEA-BARMM, ya puede confisca na posesion de Saban mas o menos 55 gramos de suspechao shabu enpaquetao na dos supot-supot de plastic que tiene el valor de P375,000, un motrociclo, diferentes tarjetas de identificacion, un celpon, dos tarjetas de banco, markao dinero, y diferentes parafernales de droga ilegal.
Con Saban ya detene na carcel del PDEA-BARMM en preparacion para el plantada del asunto contra conele por violacion del “Comprehensive Dangerous Drugs Act of 2002”.
Asegun con el PDEA-BARMM, con Saban ya aresta ya del Agosto 2021 por violacion envuelto mga actividades de droga ilegal.
Asegun con el PDEA-BARMM, si Datu ya puede escapa y ya esconde na forestal despues que ya gole le el presencia del mga autoridad durante el “buy-bust operation” na Sitio Kitub, Barangay Rumidas, Buldon, Maguindanao del Norte del Miercoles.
Asegun con el PDEA-BARMM, si Datu y su cohorte ya tira con el mga autoridad quien ya ase apas conele que ya resulta na un corto tirahan.
Asegun con el PDEA-BARMM, ya puede escapa si Datu durante el corto tirahan.
El mga agentes del PDEA-BARMM ya recubri mas o menos sinco gramos de suspechao shabu que tiene el valor de P34,000.
El PDEA-BARMM ya habla cay ay planta formal asunto contra con Datu por violacion del Comprehensive Dangerous Drugs Act of 2002. (B. Garcia, photo courtesy of PDEA-BARMM)