Un “high value individual (HVI)” el ya aresta y valor de P47.6 millon droga el ya confisca na un campaña contra droga ilegal aqui na ciudad, asegun con el policia local.
El policia local ya habla con el arestao HVI suspechao ya conose como si Alkhomunie Usil, 31, un residente del Barangay Lamion, Bongao, Tawi-Tawi.
Asegun con el policia, con Usil ya aresta na un “buy-bust operation” del Miercoles denoche na un motel na Barangay Putik, en este ciudad.
Asegun con Police Colonel Alexander Lorenzo, el Zamboanga City Police Office (ZCPO) director, con Usil ya aresta el mga operativas del policia despues que ya ase le transaccion de droga ilegal con un secreta del polis.
Asegun con Lorenzo, ya puede recubri desde’l posesion del arestao suspechao siete paquetes de plastic que ta contene siete kilos de suspechao shabu con el valor de P47.6 millon, dos bolsa de papel, 999 pedaso de P1,000 que ya usa como “boodle money” que ya pone insima un verdadero P1,000 que ya usa como markao sen, “lighter”, y caja que ya conene un palito de cigarillo.
Si Lorenzo ya habla ya detene con el arestao suspechao en preparacion para el plantada del asunto por violacion del “Comprehensive Dangerous Drugs Act of 2002”. (B. Garcia, photo courtesy of Zamboanga City Police Office)