Catorce personas, incluido siete bata, el ya iri cuando el dos vehiculo que ya munta sila ya man banggaan cabesa-con-cabesa na carretera del costa oeste de este ciudad, asegun con el policia local.
Asegun con el policia, el incidente ya ocuri mga alas 10:50 del Miercoles denoche na carretera del Sitio Pitogo, Barangay Sinunuc, na costa oeste del ciudad.
Base na investigacon, el dos vehiculo, el uno de gobierno que ta maneja si Edwin Joven, 45 años el edad y el otro, un privado vehiculo ta maneja si Alejandro Funtalan, 46, ya man banggaan cabesa-con-cabesa cuando guinda si Funtalan na otro lao del camino despues que ya desvia le con un perro na camino.
Si Joven ta viaja hunto con nueve pasajeros, incluido sinco bata, para na Barangay Limpapa na costa oeste mientras si Funtalan ta viaja hunto con tres pasajeros, incluido dos bata, para na direccion del pueblo durante el incidente.
Ambos vehiculos el destrosao y ambos chufer y el de ila mga pasajeros el ya iri porcausa del fuersa del banggaan.
Ya leva canila todo para na Zamboanga City Medical Center para el curada medical. (B. Garcia)