Un guardia ya muri myentras tres otro personas ya iri na un incidente de tiro ayer aga na un privado pantalan na Barangay Baliwasan, este ciudad.
Asegun con Major Francis Briones, el hefe del Police Station 6, con el muerto guardia ya conose lang como un tal Philix, sesenta años el edad.
El tres irido victima amo canda Albasar Abdul Amiril, treynta siete años el edad; Mohammad Taha Panolera Saddalani, veinte seis; y si Saramae Panolera Saddalani, anak del dueño del privado pantalan.
Asegun con Briones cay base na investigacion, ta man cuento el maga victima maga alas seis veinte del ayer aga, Lunes, cuando ya tira canila el un desconosido armao persona.
Despues del tira, calmante ya camina el suspechao para na su motorsiclo y ya escapa.
Si Briones ya habla ya ta continua sila investiga el incidente para determina si cosa el motivo y si quien el echor. (B. Garcia) (Photo Courtesy of Remus Ong)