Maga personajes del 2nd Zamboanga del Sur Provincial Mobile Force Company (2ZDSPMFC) ya aresta un persona y confisca valor de siento sincuenta mil pesos contrabando na municipio del Kumalarang provincia del Zamboanga del Sur.
Asegun con Coronel Diomarie Albarico, el director del pulisiya na provincial del Zamboanga del Sur, cay ta conduci checkpoint maga personajes del 2ZDSPMFC cuando ya ase sila para un trak de carga maga alas dies del ayer aga, Lunes, na Barangay Boyugan West, Kumalarang.
Durante el inspeccion, ya descubri maga pulis cay el trak que ta maneja si Gajir Sabiran, veinte ocho años el edad, ta contene maga cigarillo.
Si Albarico ya habla cay con Gajir enseguidas ya aresta y ya confisca con el maga cigarillo despues que ya falya presenta documento el chufer sobre su cargamento.
Asegun cay el maga cigarillo estaba na ciudad de Zamboanga y para vende na Zamboanga del Sur.
(B. Garcia)
(Photo Courtesy of Zamboanga del Sur Provincial Police Office)