El mga personajes del Guardia Costera del Filipinas o PCG ya coge un varco de pesca que ta contene P21.6 millon valor de contrabando na mar del provincia del Zamboanga Sibugay, asegun con el PCG del Miercoles.
Asegun con el Coast Guard (CGDSWM), con el varco de pesca ya coge na vicinidad del Isla de Olutanga, Zamboanga Sibugay, del Lunes.
Asegun con el CGDSWM, ta conduci patrulla de maritima el mga personajes del guardia costera abordo na varco del Bureau of Fisheries and Aquatic Resources (BFAR), el Monitoring, Control, and Surveillance-3001 (MCS-3001), cuando ya columbra sila con un varco de pesca na vicinidad del Isla de Olutanga.
Asegun con el CGDSWM, durante el inspeccion, ya descubri mga personajes del MCS-3001 cay ta contene mas o menos 350 cajon del cigarillo el varco de pesca nombrao como el MPD TRD Express.
Ya confisca con el varco y cargamento y ya aresta con el mga tripulantes despues que nohay ni uno de ila el ya puede presenta documentos del mga cajon-cajon de cigarillo.
Asegun con el CGDSWM, con el varco, cigarillo y mga tripulantes ya entrega para na custodia del Buro de Aduana para el propio disposicion. (B. Garcia)
(Photo Courtesy of CGDSWM)
