Por cuasa del monton reclamo aserca el abuso ta comete maga chufer de tricycle, el govierno local ya establisa Tricycle Complaint Desk para atende con maga reclamo del publico.
El Administrador Mario Yanga, base na orden del alcalde John Dalipe, ya establisa con el Tricycle Complaint Desk y ya designa maga personajes quien ay atende con maga hotline numbers y Facebook page incluwido hasta el ponida del maga complaint desk na maga bazar y otro maga lugar na ciudad.
Maga personajes del Tricycle Complaint Desk ay dale con el publico un plataforma para uwi maga reclamo y implementa mejoras; cuji con el maga chufer ya comete error, confisca el licensia, dale ticket and man impound con maga tricycle; atende con maga reclamo y recomenda na Tricycle Adjudication Board (TAB) para revisa y possible revoca con el frankisa del maga chufer pirmi ta comete error; ase advocasiya y estrictamente implementa con el Ordinance 185 que ta regula el operasion del tricycle na ciudad de Zamboanga.
Base na ordinansa, cay si no quiere lleba pasajero o carga para na de ila destinasion y ta cobra pasaje mas alto con el autorisao cantidad de pasaje es un legal base para cansela con el certifico de conviniensia publico del tricycle.
Para con maga chufer no quiere lleba pasajeo, el multa es cuatro mil pesos para el primer ofensa, sinco mil pesos para el Segundo, y cancelasion y revocasion del frankisa para el terser culpa.
El multa para con maga chufer hasta el duenio na cobrada de pasaje mas alto na autosisa cantidad de pasaje es cuatro mil pesos para el primer ofensa, sinco mil pesos para el segundo y cancelasion y revocasion del frankisa para el terser culpa. (Bong Garcia, Jr.) (Photo Courtesy City Government of Zamboanga Page)