Ya comenda si Brigadier General Leonardo Peña, el comandante del 11th Infantry Division (11ID), con el mga personajes del 101st Infantry Battalion (101IB) por el de ila exemplario servicio y inquebrantable dedicacion, enfatizando el de ila papel crucial na preservacion de paz y seguridad na Sulu, asegun con el militar del Sabado.
Asegun con el 11ID, si Peña ya hace el comendacion cuando ya visita le na quartel del 101IB del Jueves na Barangay Lahing-Lahing, Omar, Sulu.
Asegun con el 11ID, ya descata tamen si Peña el importancia del mantenimiento del alto estandarte de autodisciplina, positivo atitud, y profesionalismo.
Durante su visitada, si Peña y si Tiniente Coronel Michael Demafelix, el comandante del 101IB, ya discuti tamen mga crucial topicos, incluido el condicion de preparaciones, actividades en curso y futuro planos del batallon.
Asegun con el 11ID, el visitada ya servi como un iniciativa de impulso moral, reinforsando el significancia del de ila mision y inspira con el mga tropas para permanence firme el de ila deber compromiso.
Durante su visitada na quartel del 101IB, con Peña ya acompania si Coronel Domingo Robles, Jr., el subjefe personal para el operaciones civiles militares y otro mga oficiales y personajes del 11ID. (B. Garcia)