Si Police Brigadier General Bowenn Joey Masauding, el director regional del policia, ya comenda el esfuerzo colaborativo del su personajes que ya resulta na identificacion y aresto del mga suspechao reciente robo de P2.1 millon aqui na ciudad.
Si Masauding ya ase el pronunciamento despues que el policia local ya puede conose y aresta con cuatro pulis, incluido un oficial, quien alegaomente envuelto na robo del P2.1 millon na Barangay Tetuan, en este ciudad del Noviembre 14.
Si Police Colonel Alexander Lorenzo, el Zamboanga City Police Office director, ya nombra con el mga arestao pulis como el siguientes: Patrolman Rayan Apostol, 31; Police Lieutenant Ariel Jolatoria, 43; Police Senior Master Sergeant Alnajer Ynawat, 41; y si Police Staff Sergeant Edcel Nicolas, 42.
Asegun con Lorenzo, con el cuatro pulis ya aresta na separao “follow-up operations” na diferente lugar aqui na ciudad de Zamboanga del Sabado.
Asegun con Lorenzo, el otro suspechao conosido como si Bobby Judan, un antes pulis, ya rindi na policia del Alicia, Zamboanga Sibugay del Sabado denoche.
Si Masauding ya asegura con el publico cay ay lleva na justicia con el mga suspechao y persigui el caso contra canila siguiendo na ley.
Ya habla si Masauding cay ay esta sila implacable na campaña para limpia con el de ila asosacion de mal personajes.
Si Masauding ya habla cay el Police Regional Office-9 ay esta comitido na de ila juramiento para sirvi y protégé con el comunidad por medio de grarantizar el proteccion del publico y seguridad como el numero uno prioridad.
Asegun con Lorenzo, ya puede establisa si quien el mga suspechao na robo base na “video” del “getaway” vehiculo de ila que ya puede saca por medio de Closed Circuit Television (CCTV) durante el incidente.
“El vehichulo ya usa mga suspechao un rent-a-car,” ya habla si Lorenzo de mas temprano. (B. Garcia)