Zamboanga: Fuersa naval ya confisca P15 milyones contrabando

0
4

El Naval Forces Western Mindanao (NFWM) ya confisca P15 milyones valor de contrabando myentras ta conduci patrulya de seguridad maritima na la mar del provincia de Tawi-Tawi, el NFWM ya anuncia del Biyernes.

Asegun con Rear Admiral Donn Anthony Miraflor, el comandante del NFWM, con el mga contrabando ya cuji del Domingo na vicinidad del Titi Point, Sanga-Sanga, Tawi-Tawi.

Asegun con Miraflor cay ta man patrulya mga personajes del Naval Task Force (NTF)-61 usando con el varco PC390 cuando ya columbra sila con un lancha, nombrao como el M/L Aizalyn III, ta navega para na direccion del municipio del Bongao, Tawi-Tawi.

Durante el inspeccion, ya descubri mga personajes del NTF-61 cay lleno de diferente clase de comestibles incluwido 1,950 saco de asucar blanco que tiene el estimao valor de P15 milyones, asegun con Miraflor.

Con el mga cargamento ya confisca despues que nohay ni uno del mga tripulantes y pasajeros del lancha ya puede presente documentos.

Asegun con Miraflor con el lancha, cargamentos y tripulantes de M/L Aizalyn III ya entrega na custodiya del Buro de Aduana na Bongao, Tawi-Tawi.

Asegun con Miraflor cay el cujida del mga contrabando es un testamento del dedicacion del fuersa naval para guardia con el fronteras maritima del pais. (B. Garcia, photo courtesy of NFWM)

Leave a Reply