Si Gobernador Henry Oaminal del Misamis Occidental ya dale P500,000 regalo con el ultimo miembro del Frente Guerrillero Front Sendong del New People’s Army (NPA) por causa ya escuji para tene paz.
Asegun con el 10th Infantry Battalion (IB), el recipiente del regalo amo si Babylin Labastida, conosido tamen como si Hill, el segundo secretaria del Frente Guerrillero Front Sendong.
Si Labastida, quien un residente de Misamis Occidental, ya rindi hunto con Matias Gaquit con mga soldao na Barangay Danao, Sergio Osmeña, Zamboanga del Norte del Deciembre 30, 2023.
Si Oaminal, quien ya extende con Labastida una calurosa bienvenida, ya dale el regalo de dinero con el antes lider del NPA durante el primer cuarto hunta del consejo provincial de paz y orden del Viernes.
“Este acto ta demonstra el dedicacion del gobierno provincial para suporta con mga estaba rebelde na de ila viaje para el pacifico y productivo vida,” el 10IB ya habla na un anuncio.
Si Oaminal, como el jefe del Provincial Task Force to End Local Communist Armed Conflict (ELCAC), ta reconose el importancia de extender ayuda con aquellos quien ya escuji rindi y abraza un futuro mas contructivo.
Si Oaminal ya habla cay el rindida de Labastida es un significante marca na esfuerzo para adqueri un libre de insurgencia Misamis Occidental, alineado con el vision del provincia encapsulado por el 5Ms (Misamisnon Magpuyong Malinawon, Malambuon ug Malipayon).
Mientras tanto, ta admira si Oaminal con el dedicacion excepcional y sacrificios ta ase si Tiniente Coronel Jose Andre Monje, el comandante del 10IB, y su tropas para bungca con el Frente Guerrillero Sendong.
“Este acomplisimiento es un testamento de compromiso inquebrantable del provincia para logra un paz duradera y prosperidad para del mga vivientes,” ya habla si Oaminal.
Ya habla si Oaminal cay el gobierno provincial del Misamis Occidental ta esta firmi en su buscar sustenable paz y unidad, y el reciente rindida es un claro indicacion cay na camino correcto para realiza el vision para mas tranquilo y future prospero. (B. Garcia, photo courtesy of 10IB)