El Alcalde Maria Isabelle Climaco-Salazar y su transition team formalmente ya entra ayer tarde na un ceremonya mga pertinente documentos con el Nuevo elejido alcalde John Dalipe.
Durante el ceremonya, si Salazar ya habla cay importante el entrego del mga pertinente documentos, propiedad y legasiya para enbuenamente continua el servicio del govierno local.
Ya rindi gracias si Salazar con mga myembros del su transition team que ta encabesa el abogao Eric Elias quien ya facilita y asegura cay enbuenamente el entrego del maga las cosas del govierno local con el Nuevo elejido alcalde del ciudad.
Si Dalipe hunto con su mga myembros del transition team ya accepta con el mga documentos y otros pa las cosas del govierno local.
Ya garantisa si Dalipe cay ay continua el servicio del govierno local con el mga residentes del ciudad amediante del cambio del liderato.
El city director Ginagene Vaño-Uy del departamento de interior y govierno local hunto con el abogada Katrina Acana, el City Auditor y Juliet Digo, presidente del civil society organization ya para como testigos na entrego del ceremonya ayer tarde. (Cristine Falcasantos, photos courtesy of City Government of Zamboanga Facebook page)