El Department of Social Welfare and Development (DSWD) hunto con el oficina del Senador Christopher Go ya dale ayuda, por medio del “Assistance to Individuals in Crisis Situation (AICS), con el 32 familya victima de un remulleno ya ocuri na Barangay Sinunuc del otro semana.
Asegun con el oficina rehyonal del DSWD cay cada un familya ya recivi P5,000 ayuda financial and valor de P2,000 enpaketao comida y “hygiene kits”.
El Alcalde John Dalipe ya rindi gratitud por parte del mga beneficiaryo por el ayuda ya dale el oficina de Go y el DSWD.
Asegun con Dalipe el ayuda ya dale si Go ay omenta con el recursos del ciudad para ayuda con el mga afectao familya lebanta otravez desde’l crisis.
Ya rindi tamen gracias el alcalde con Congresista Khymer Olaso del primer distrito y Congresista Jose Manuel Dalipe del segundo distrito por el colaboracion na dalida del ayuda con el mga familya afectao remulleno.
Un persona el ya iri myentras 30 casa, incluwido un mosque, el ya destrosa por causa de un remulleno ya ocuri na Barangay Sinunuc, este ciudad, amediante el aguasero del Agosto 9. (B. Garcia, photo courtesy of DSWD-9)