Mga elementos del pulisiya local ya aresta con dos personas tiene pendiente orden de aresto desde’l jusgado aqui na ciudad de Zamboanga.
Con el mga arestao wanted personas ya conose como canda Elly Bernardo, sincuenta’y uno anios, y si Lando Delos Reyes, cuarenta’y tres anios el edad.
Asegun con Major Ramon Aquiatan, Hijo, hefe del Police Station 5, cay con Bernardo ya aresta mga alas onse del aga ayer alli na Calle Hermonia, Purok 4, Barangay Lunzuran.
Si Aquiatan ya habla cay si Bernardo ta enfrenta el asunto de two-counts slander y tiene el corespondiente orden de aresto y con el recomendao piansa de treynta’ys seis mil de pesos. Myentrastanto, con Delos Reyes ya aresta mga personajes del Police Station 11 mga alas dose veinte del tarde ayer na Calle Governor Lim, Barangay Zone 1, este ciudad.
Asegun con el Police Station 11 cay si Delos Reyes tiene el pendiente orden de aresto por el crimen de rape sin piansa ya dale el jusgado local del Hunyo treynta, anio dos mil veinte dos. (April Boy Regino)