El mga autoridad ya larga con un Philippine Tarsier (Chonggo Magu) na de suyu habitat natural na provincia del Zamboanga del Norte, asegun con el Departamento de Medio Ambiente y Recursos Naturales o el DENR del Miercoles.
Asegun con El Oficina Regional del DENR, con el tarsier ya larga na monte de Sinai, Barangay Sinai, Sergio Osmeña, Zamboanga del Norte del Sabado, un dia despues que ya recubri con el animal.
Asegun con el DENR, con el tarsier ya encontra si James Elnar na su jardin na Sitio Jupiter, Barangay Venus, Sergio Osmeña.
Si Elnar ya entrega con el tarsier na oficina municipal del medio ambiente y recursos naturales del Sergio Osmeña para el propio cuidada.
Asegun con el DENR, el grupo tecnico del oficina de medio ambiente y recursos naturales del municipio del Piñan, Zamboanga del Norte, que ta encabesa si Maribel Acama, el hefe del monitoring and enforcement section, ya evalua y ya determina cay na buen salud el tarsier para larga conele na su habitat natural.
El largada del tarsier del Sabado ya ase por medio del esfuerzo colaborativo entre el oficina de medio ambiente y recursos naturales del municipio del Piñan que ta encabesa si Adelaida Borja, mga personajes del oficina provincial de medio ambientes y recursos naturales que ta encabesa si Renerio Acama, y el oficina municipal de medio ambiente y resursos naturales del Sergio Osmeña bajo el liderato de Jon Fuerzas.
El indigena areredor del Monte de Sinai, donde ya larga con el tarsier, ta dale un buen oportunidad para vivi el mencionao animal.
Mientras tanto, el DENR ta apela con el publico para notifica con mga autoridad en tal caso puede sila encontra tarsier na de ila lugar para el propio proteccion del mencionao animal.
(B. Garcia, photo courtesy of DENR-9)
