Hugot nga gipatuman sa Zamboanga del Norte ug sa duha ka dakbayan sa Dipolog ug Dapitan ang gi-imposar nga General Community Quarantine sa tibuok probinsya sa Gobernador aron malikayan ang pagkuyanap sa CoVid-19.
Sa gihimo nga pagsusi sa border check points sa Dipolog nasaksihan nga gipangunayan mismo sa Alkalde sa dakbayan ang pagsubay sa dagan sa check point boundary sa Dipolog ug sa lungsod sa Katipunan nga naa nahimutang sa Barangay Punta.
Matud pa ni Mayor Uy nga sa ikaduha ka adlaw nga pagpatuman sa General Community Quarantine sa Dipolog sugod kaniadtong Marso 18, hapsay na ang dagan niini.
Giangkon ni Mayor Darel nga nakahinagbo sila ug gamay’ng problema sa unang adlaw, apan ila ra usab kining natubag nianang pagkahapon.
Matud pa sa mayor nga sagad sa nahinagbo nga problema sa otoridad mao ang pag fill-out sa declaration form nga miresulta sa kalangan ug sa kahuot sa linya.
Giawhag lamang ni Mayor Darel ang publiko nga magtinabangay kitang tanan niining panahon sa krisis.
Limitahan ang paglakaw kondili kini importante o kinahanglan.
Giawhag usab niya ang katawhan sa pag-ampo aron mawala ning maong pandemic disease.
Samtang si SSG. Ian Abunda, ang Compact Supervisor sa Barangay Punta ang namahayag usab nga karon hapsay na ang pagpatuman nila sa general community quarantine kumpara sa unang adlaw niini.
Usa sa ilang pamaagi mao ang pagpasabot sa publiko nga kung mosulod dinhi sa dakbayan sa Dipolog ug walay importanteng tumong, ilang pabalikon kon asa sila gikan nga lungsod.
Aron dili malangan, adunay gihimo nga tulo ka lanes sa pagpasulod sa lain-laing matang sa sakyanan. Lahi-lahing lane mosulod ang motorsiklo cargo trucks ug pribadong sakyanan.
Ang matag indibidwal sakay sa maong mga sakyanan mopailawum sa thermal scanning. Samtang ang mga ligid sa cargo trucks gi-sanitize usab kini aron malikayan ang pagkatap sa CoVid-19.
Samtang sa gihimong border checkpoint sa Barangay Sicayab, boundary sa dakbayan sa Dipolog ug Dapitan, na-obserbahan nga hapsay usab ang pagpatuman niini.
Si Mr. Jivie Moras, taga lungsod sa Polanco ug usa ka trabahante sa G Baron Construction sa Sta. Cruz, dakbayan sa Dapitan ang nagkanayon nga mas maayo nga gihimo kini sa otoridad aron malikayan ang pagkatap sa CoVid-19.
Si Mr. Moras kada adlaw kining nagbyahe gikan sa lungsod sa Polanco padungsa Dapitan ug adunay bitbit nga certificate of employment.
Hiniusang gihimo ang 24 oras nga check point sa Philippine National Police, Bureau of Fire Protection, Philippine Army, City Disaster Risk Reduction and Management Council, Traffic Management Office ug suporta sa opisyal sa barangay, ug sabuhatan sa agrikultura aron sa pagsusi sa gipang-transportar nga pagkaon.
Sa nahilambigit nga balita, sa gipatawag nga panagtigum ni Governor Roberto Uy sa mga mayor sa duha ka dakbayan sa Dipolog ug Dapitan ug sa mga kalungsuran ning probinsya sa Zamboanga del Norte, iyang gipahibalo nga sugod karong Marso 21, 12:01 sa tungang gabii, ipatuman na ang Executive Order Number 2020-24-A sa gobernador nga “An Order Amending Section 1 (2) of Executive Order Number 2020-24.
Sa maong Orden de Ehekutibo, gipaklaro ni Governor Uy nga ang health workers nga ngatrabaho sa probinsya, katawhan nga nagresponde sa emerhensiyang sitwasyon, otorisadong kawani ug opisyal sa gobyerno nga adunay byahe kalabot na sa CoVid-19, uniformed personnel amd government auxiliary forces nga naghimo sa ilang trabaho, kadtong nagbyahe alang na sa hinanaling medical reason nga walay labot ang indibidwal nga adunay CoVid-19 ug respiratory cases, indibidwal o grupo nga naghatag ug tabang ug serbisyo, ug ang nagkinahanglan nga personahe sa pag-transportar sa pagkaon, cargoes ug supplies ang mao lamang  gitugutan sa pagsulod sa probinsya sa Zamboanga del Norte, apan kung aduna silay e-presentar nga proof of identification ug uban pang gikinahanglan nga dokumento nga nakasitar sa gabayan, ug ilabi na nga dili sila Person Under Investigation (PUIs) o adunay temperature nga 37.6 degrees Celsius pataas, sa pagsulod unya nila nganha sa gipahimutang nga provincial check points.
Giawhag ni Governor Uy nga mosanong niini aron hapsay ang dagan sa maong mga checkpoints.