Irido el un chufer de pedicab na un incidente de tiro Biyernes madrogada na Manggal Drive, Baliwasan, este ciudad.
Asegun con el Zamboanga City Police Office (ZCPO) Station 11 con el victima ya conose como si Junjun Nicolas, 40 años el edad y residente de Barangay Baliwasan.
Asegun con el pulisiya local cay ta camina si Nicolas maga alas 12:10 del aga na Manggal Drive cuando ya nota le tiene dos personas ta sigi conele na atras.
Enseguidas si Nicolas ya istindi pero ya ase conele apas el dos desconosidos personas y uno del dos ya tira con el victima usando calibre 45 pistola.
Ya escapa elm aga suspechao despues del incidente myentras con Nicolas ya lleba na hospital maga concierne residentes del Manggal Drive, Baliwasan.
El pulisiya ta continua investiga con el incidente para sabe si cosa el motive y si kien el maga suspechao. (B. Garcia, photo courtesy of Zamboanga City Police Office)