Un persona el ya aresta el mga autoridad na un campaña contra ilegal cortada del palo mientras dos el ya puede escapa na provincia del Lanao del Sur, asegun con el policia del Miercoles.
Si Police Colonel Robert Daculan, el director del policia na Lanao del Sur, nohay nombra con el arestao persona puera lang de habla’r cay ele el chufer del trak que ta carga con el mga ilegal cortao palo.
Asegu con Daculan, el dos quien ya puede escapa ya conose como si untal Dondon y un tal Peter.
Asegun con Daculan, con el chufer del trak ya puede aresta mga alas 5:30 del Lunes aga na Barangay Maul Lumbaca Ingud, Marantao, Lanao del Sur.
Si Daculan ya habla, el mga personajes del policia de Marantao ya cogi con el chufer despues que el trak lleno de coartao palo que ta maneja ele ya man bangga na residencia de Emma Macaorao na Barangay Maul Lumbaca Ingud.
El mga personajes del policia del Marantao, ta man patrulla cuando ya columbra sila con el trak lleno de palo ya man bangga y ya causa destroso con el residencia de Macaorao.
El dos compañeros del chufer, si Dondon y Peter, enseguidas ya escapa cuando ya mira sila ta llega el mga pulis na lugar del accidente.
Asegun con Daculan, con el chufer enseguidas ya aresta y con el trak y palo ya confisca despues que ya falla le presenta documentos del su cargamento.
Asegun con Daculan, con el arestao chufer ya pone bajo’l custodia del policia del Marantao para el propio disposicion. (B. Garcia)