Zamboanga: Barco de fesca ya cogi ilegalmente ta man fescada

0
5

Con un barco de fesca el ya cogi el mga autoridad ilegalmente ta fesca na mar del municipio del Mohammad Ajul, Basilan, asegun con un oficial del Jueves.

Asegun con Mayor Talib Pawaki del Mohammad Ajul, con el barco de fesca ya cogi sila pati el mga personajes del Army Special Forces ilegalmente ta fesca na mar del su municipio que reservao para con mga Pescadores marginales.

Asegun con Pawaki, el barco de fesca que el dueño es un compania de fescada base aqui na ciudad de Zamboanga ya puede ya cogi mucho fescao.

Si Pawaki ya habla, cuando ya cogi sila con el barco de fesca, tiene ya este ta carga el total de 135 contenedores lleno de fescao matambaka y galunggung que tiene el estimao valor de P200,000.

Asegun con Pawaki, con el barco de fesca, el mga tripulantes, y mga cogido fescao ya entrega sila na custodia del Ministry of Agriculture, Fisheries, and Agrarian Reform del Bangsamoro Autonomous Region in Muslim Mindanao (MAFAR-BARMM) para el propio disposicion.

Asegun con Pawaki, ay planta sila caso contra con el dueño del barco de fesca por violacion del ley de fescada. (B. Garcia)

Leave a Reply