Nueve personas el ya aresta y ya confisca valor de P14 millon contrabando mga autoridad na un operacion de aplicacion de ley aqui na ciudad, asegun con el policia local del Sabado.
El policia local ya nombra con el mga arestao personas como el siguientes: Roger Anih, 39 años el edad; Edgar Salomia, 37; Sisal Anih, 28; Tony Lasad, 27; Asulla Sala, 42; Moh. Isa Patta, 31; Ansal Muksan, 38; Rosten Mundih, 34; y si Alphine Manood, 30.
Asegun con el policia, con el nueve nombrao personas ya aresta ta mientras transporta contrabando mga alas 10:30 del Viernes denoche na aplaya del Barangay Baliwasan, en este ciudad.
El mga personajes del policia y Buro de Aduana ta man patrulla cuando ya columbra sila un jungkong markao “JFM2” con nueve personas y ta carga mga cigarillo sin el propio documentos.
Asegun con el policia, ya confisca na posesion del nueve arestao personas 482 cajon de cigarillo que tiene el valor de P27.4 millon.
Con el nueve arestao personas, el jungkong y elm ga cajon de cigarillo ya entrega na custodia del Buro de Aduana para el propio disposicion. (B. Garcia)