Tres personas el ya aresta y ya confisca P108,800 valor de droga ilegal cuando ya desmantela el mga autoridad un cuarto de droga na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Viernes.
El PDEA-BARMM ya identifica con el mga arestao suspechao como canda Terry Pananggalon Cando, 35 años el edad, el mantenedor del cuarto de droga; Ariel Candol Pampliega, 44; y si Tomas Ramon Mario Lago Martinez Jr., 27.
El PDEA-BARMM ya habla, con Cando ya aresta ya del año 2018 por violacion del ley contra droga ilegal.
Asegun con el PDEA-BARMM, con el tres suspechao ya aresta na un operacion de compra busto que ya resulta na desmantelada del cuarto de droga del Jueves na Sitio Malagapas, Barangay Rosary Heights 10, ciudad de Cotabato, BARMM.
Asegun con el PDEA-BARMM, ya confisca na desmantelao cuarto de droga 16 gramos de suspechao shabu que tiene el valor de P108,800, varias parafernales de droga ilegal, dinero de compra busto, un portamoneda, y clasificao tarjetas de indentificacion.
El Alcalde Mohammad Bruce Matabalao del ciudad de Cotabato hunto con Gil Cesario Castro, el director del PDEA-BARMM, ya comenda con el mga operativas, concierne residentes, y miembros de Barangay Anti-Drug Abuse Council por el de ila esfuerzos implacable para supresa con el problema de droga ilegal na ciudad de Cotabato.
“Este operacion ta servi como un claro advertencia con aquellos quien engranao na actividades de droga ilegal na ciudad de Cotabato cay el mga agencias ta enforsa ley hinde descansa hasta todo el mga violadores de droga hay entra na preso,” y habla si Castro.
El tres arestao suspechao detenido na carcel del PDEA-BARMM en preparacion para el plantada del asunto contra canila por violacion del Ley Integral de Drogas Peligrosas de 2002. (B. Garcia)