El combinao operativas del militar y policia ya captura con ocho mga mal elementos de sociedad y ya confisca 14 armas de fuego de alta calibre siguiendo el tirahan na provincia del Norte Cotabato, asegun con el militar del Sabado.
Asegun con Commander Jennifer Pili, el portavoz del Western Mindanao Command (Westmincom), el tirahan, que ya alcansa sinco minutos, ya ocuri na Barangay Kudarangan, Midsayap, Norte Cotabato, del Jueves.
Asegun con Pili, el tirahan ya principia cuando el mga mal elementos del sociedad que ta encabesa si Sukarno Madidis Tayuan ya tira con el mga tropa del 34th Infantry Battalion (IB) y policia mientras ta man patrulla mga autoridad na Barangay Kudarangan, Midsayap.
El tirahan ya resulta na capturada del siete mal elementos del sociedad y recubrida del siete pusil de alta calilbre.
Asegun con Major General Alex Rillera, el comandante del Joint Task Force (JTF)-Central, el objeto del patrulla amo para privini que escala el reciente encuentro entre dos pellao man pamilia na Barangay Kudarangan, Midsayap.
Con el mga capturao mal elementos del sociedad ya conose como canda Mangumpal Tutukan, Ali Usman, Ebrahin Usman, Kadil Kaninda, y Jonix Esmail, todo residents del Barangay Damatulan, Midsayap; y si Solaiman Kamensa y Kevin Ebrahim, ambos mga residentes del Barangay Kudarangan, Midsayap.
Ya recubri na de ila posesion siete riple M14 con clip y bala.
El tropa del 34IB ya conduci “pursuit operation”, que ya resulta na capturada del otro uno miembro del mal elementos del sociedad conosido como si Tha Usman, un residente del Barangay Kadigasan, Midsayap.
Mga soldao ya puede recubri siete riple Armalite y mga bala que ya abanodona el mga mal elementos quien ya escapa.
El mga capturao mal elementos de sociedad y mga recubrido armas de fuego ya pone bajo del custodia del policia na municipio de Midsayap.
Si Tiniente General William Gonzales, el comandante del Westmincom, ya comenda con el mga troops cay ya puede sila pacifica con el situacion caotica na Barangay Kudarangan.
Si Gonzales ya atribui con el buen exito del mision por el fuerte colaboracion entre el 34IB y policia del municipio del Midsayap.
“El capturada del mga armao personas debe sirvi como un leccion para con aquellos quien ya plaña crea estruendo por causa de ila disputas y conflictos.” Si Gonzales ya habla. (B. Garcia, photo courtesy of Westmincom PIO)