Un negociante el ya aresta y ya confisca valor de P108.8 millon droga ilegal el mga autoridad na un operacion de compra busto aqui na ciudad de Zamboanga, asegun con el Criminal Investigation and Detection Group-9 (CIDG-9) del Sabado.
Asegun con el CIDG-9, con el arestao negociante ya conose como si Alnasher Mudah, 42, un residente del Barangay Talon-Talon, en este ciudad.
Con Mudah ya aresta mga alas 6:45 del Viernes denoche na Calle Governador Camins, Barangay Canelar, en este ciudad, el combinao grupo de operativas del CIDG-9, Philippine Drug Enforcement Agency-9 (PDEA-9), y policia local y regional.
Asegun con el CIDG-9, ya confisca na posesion de Mudah 16 kilos de suspechao shabu enpaquetao na 16 paquetes plastico que tiene el valor e P108.8 millon, 16 paquetes de “boodle money” que ya pone insima un real P1,000 como markao sen, un celpon, un vehiculo, mga parafernales de droga illegal y otro cosas personal.
Asegun con el CIDG-9, ya detene con Mudah en preparacion para el plantada del caso contra conele por violation del ley de republica 9165 o mas conocido como el Comprehensive Dangerous Drugs Act of 2002. (B. Garcia)