Un conocido lider de un potencial grupo armado privado el ya aresta el mga autoridad na un operacion de aplicacion de ley na provincia del Maguindanao del Norte, asegun con el policia del Jueves.
El Police Regional Office-Bangsamoro Autonomous Region (PRO-BAR) nohay nombra con el arestao lider de un potencial grupo armado privado puera de habla’r el arestao suspechao listao como el numero dos persona mas buscada na municipio del Sultan Mastura, Maguindanao del Norte.
Asegun con el PRO-BAR, con el suspechao ya aresta na un operacion de aplicacion de ley por medio de impementar orden de aresto del Miercoles, na Barangay Balut, Sultan Mastura.
Asegun con el PRO-BAR, con el suspechao ya aresta despues que ya recivi informacion el mga policia del Sultan Mastura aserca el presencia del persona mas buscada na Barangay Balut.
El PRO-BAR ya habla, el arestao persona mas buscada tiene pendiente orden de aresto sin recomendao piansa por el crimen de matansa que ya dale el un corte na ciudad de Cotabato del Septiembre 4, 2013.
Asegun con el policia, nohay resisti el suspechao cuando ya informa conele el mga autoridad su derechos y naturalesa del del aresto.
El suspechao presentemente bajo na custodia del policia na municipio del Sultan Mastura. (B. Garcia)