El 622 estudiante-atletas del ciudad de Zamboanga quien ya participa na nuevo concluido Zamboanga Peninsula Regional Athletic Association (ZPRAA) ya recivi incentivo desde con el gobierno local.
Asegun con el Alcalde John Dalipe cada uno de ila ya recivi P3,500 incentivo que ya distribui del ayer, Miercoles.
El incentivo ya alcansa na total de P2.17 millon para con todo’l atletas de ciudad. El fondo del incentivo estaba na fondo del especial educacion.
Si Dalipe ya ordena dale incentivo con el mga atletas como parte del suporta del gobierno local con el delegacion del ciudad de Zamboanga que ya gana como el este año campeon na ZPRAA.
El ZPRAA ya conduci aqui na ciudad el Zamboanga desde April 21 hasta Abril 27.
El mga atleta del ciudad amo el quien ay representa con el region na Palarong Pambansa, que ay hace na ciudad de Cebu na mes de Hulyo. (B. Garcia)