El “Muay Thai Team” del ciudad del Zamboanga ya gana 10 medalya de oro, dos de plata, y dos de bronze na “combat category” del reciente “Regional Muay Thai Championships” ya conduci na ciudad de Heneral Santos.
Asegun con Dr. Cecil Atilano, el city sports development officer del ciudad, cay el concurso de deportes de Muay Thai ya conduci desde Agosto 16 hasta 20.
Asegun con Atilano cay aquellos quien ya gana medalya de oro amo el siguientes: Shaun Azlan Gangoso; Ralf Ian Rubio; John Michael Etac; Jerome Negapatan (dos medalya de oro); Sheer Michael Librero; Gerald Devon Cañete; Elcid Isnani; Andrei Garcia; y si Prince Ian Berdon.
El mga atleta ya gana medalya de plata amo canda Hersky John Veloro y si Ricka Rose Trasmonte.
Aquellos quien ya gana medalya de bronze ta incluwi si Prince Ian Berdon y si Abdurahman Abbas.
El de ila mga treinadores (coaches) amo canda Reynold Onyok Trasmonte y si Arbold Palpalatoc.
El Alcalde John Dalipe ya extende su felicitacion con el mga atleta y mga treinadores de Muay Thai del ciudad por el honor ya dale sila con el Zamboanga na actividad de deportes. (B. Garcia, photo courtesy by Dr. Cecil Atilano)