El Departamento del Trabajo y Empleo o el DOLE ya dale P700,000 ayuda financial con un asociacion de mga agricultores na provincia de Zamboanga del Norte por medio del “DOLE Integrated Livelihood Program (DILP).
Asegun con el DOLE del Jueves, el recipiente del ayuda financial amo el Makinaryas Alsa Masa Farmers Association (MAMFA) base na Barangay Bunawan municipio de Godod, Zamboanga del Norte.
Asegun con el DOLE, el P700,000 ayuda financial que ya entrega con el gobierno municipal del Godod, el socio acreditado del DOLE, ya usa para compra mga arimienta, pesticidios, abono y similia para el proyecto agricultural de mais y gulay.
Asegun con Aileen Mondejar, el jefe del DOLE na provincia del Zamboanga del Norte, el proyecto de agricultura ay beneficia 72 miembros del MAMFA y de ila familia compuesto de mga siembradores, jovenes fuera de escuela, personas con discapacidades, personas mayores y hasta mga gentes indigena quien mga estaba simpatizantes del grupo comunista.
Si Junrey Bacang, el presidente del MAMFA, ya rindi el sincero gratitud con el DOLE por parte del su mga miembros y ya promete cay hay sustene sila con el proyecto por medio de tabajar bien.
Asegun con Bacang, el proyecto es un testamento cay el gobierno muy accessible ya con el publico.
El Alcalde Abel Matildo del Godod ya expresa su gratitud con el DOLE que ya hace possible el proyecto para del MAMFA.
Ya promete si Matildo para conduci un dialogo con el gobierno provincial de Zamboanga del Nore concierne el construccion de camino que ay aumenta el actividades de economia del Sitio Makinarias, Barangay Bunawan, Godod.
El programa del DILP es un contribucion del DOLE na agenda del gobierno de crecimiento inclusivo por medio de generacion de empleo y reduccion sustancial de pobreza.
(B. Garcia, photo courtesy of DOLE)