El gobierno provincial del Zamboanga del Norte ya dale 200 saco de 50 kilos arroz y diferente clase de comestibles con mga antes rebelde New People’s Army (NPA) quien bajo na poder del 97th Infantry Battalion (IB).
El 97IB ya facilita con el ceremonia de entrego del mga comestibles con el mga antes rebelde NPA, con quien ta llama ahora como el amigos rescatados (Friends Rescued), na quartel del batallon na Barangay Del Pilar, Piñan, Zamboanga del Norte del otro semana.
Con el ceremonia ya atende si Señor Alex Sabal, el oficial-en-cargao del oficina provincial de bienestar y desarollo social del Zamboanga del Norte, y si Tiniente Coronel Jimmy Sanz, el comandante del 97IB.
Si Sanz ya enfatiza del Martes el importancia del dalida de ayuda y suporta con el mga amigos rescatados quien ya escuji para abandona con el de ila armao peleya y bira otravez bajo el poder del ley.
“Comprometido came para ayuda con el mga amigos rescatados na de ila transicion para na un pacifico y productivo vida. Ta esperansa came cay este buena voluntad ay inspira con el otros hace semehante escujida y busca un pacifico resolucion con el de ila sentimientos,” si Sanz ya habla.
El entrego del mga comestibles con el mga antes rebelde NPA na Zamboanga del Norte es un base que comprometido el gobierno busca permanente paz y desarollo na mga lugar afectao na conflicto.
El 97IB, junto con el agencias asociadas, ta esta firme na mision para suporta con el reintegracion del mga amigos rescatados y para sustene paz y desarollo na Zamboanga del Norte. (B. Garcia, photo courtesy of 97IB)