Zamboanga: Akbar MTF-ELAC ya declara persona non-grata con el Grupo Abu Sayyaf

0
5
(Photo courtesy of Akbar MTF-ELAC)

El Municipal Task Force to End Local Armed Conflict (MTF-ELAC) del municipio de Akbar, provincia de Basilan, ya declara con el mga miembros del grupo Abu Sayyaf como mga persona non-grata na de ila lugar.

El declaracion ya hace por medio de un resolucion que ya aprova del Lunes durante el junta del MTF-ELAC que ta encabesa el Alcalde Alih Sali del municipio del Akbar.

El resolucon del MTF-ELAC ta reforza con el rechazo del comunidad contra terorismo y ta empatiza el compromiso na paz y seguridad del lugar.

Ademas, el declaracion con el grupo del Abu Sayyaf como persona non-grata ta refleja el mafuerza postura contra na amenaso na seguridad y bienestar del comunidad.

Antes del junta del MTF-ELAC, el nueve barangay del municipio de Akbar ya somete de ila cada’y cual resolucion que ya declara persona non-grata con el grupo del Abu Sayyaf na de ila cada’y cual barrio.

El grupo del Moro National Liberation Front bajo el liderato de Commander Basser Basta ya declara tamen de ila mafuerza oposicion con el terorismo na de ila comunidad.

El grupo de Basta base na Campo Mujahid, Barangay Semut, Akbar.

Asegun con el militar, el mga declaraciones que ya hace el MTF-ELAC, nueve barangays del Akbar y MNLF ya demonstra el unificado decision contra extermismo y terorismo na municipio.

Bajo na liderato de Sali, el gobierno municipal ta dale prioridad na mantencion de paz y orden na municipio del Akbar con esfuerzo colaborativo del 18th Infantry Battalion, policia, y MNLF. (B. Garcia)

Leave a Reply