El 97th Infantry Battalion (97IB) base na provincia del Zamboanga del Norte ya recivi omento de 23 personajes desde’l 1st Infantry Division (1ID) del Philippine Army.
Asegun con el 97IB, el omento personajes compuesto de 22 mga nuevo soldao quien ya gradua na Curso de Candidato de Soldado del Julyo 12, 2024 y el uno estaba na Task Force Zamboanga del 1ID.
Si Major Noelio Brigole Jr., el official ejecutivo del batallon ya recivi con el mga nuevo designao personajes en calor de Tiniente Coronel Jimmy Sanz, el comandante del 97IB.
Na mismo tiempo, si Brigole el ya encabesa con el ponida del 97IB parche de unidad na uniforme del mga nuevo designao personajes na mencionao batallon.
Asegun con el 97IB, el ponida del parche de unidad ya conduci del Lunes durante el ceremonia de la bandera na quartel del batallon na Barangay Del Pilar, Piñan, Zamboanga del Norte.
El tradicional ponida de parche de unidad ta simboliza el official integracion del mga nuevo miembros para na 97IB, marcando el de ila dedicacion para proteje y sostene paz dentro na lugar de operaciones del batallon.
Si Brigole ya conseja con el mga nuevo graduao soldao para usa con el de ila sabidoria y habilidades que ya aprende sila durante el de ila entreno.
Mayoriya de ila hay designa na compania de maniobra del 97IB, asgun con Brigole.
Asegun con Brigole, hay estacionao canila na provincia del Lanao del Sur siendo declarao ya el provincia del Zamboanga del Norte librao desde’l insurgencia. (B. Garcia)