El comite organizador ya conduci inspeccion ocular con mga escuelas publicos donde que hay servi como dormitorio del mga atleta mientras ta aserca ya el “Zamboanga Peninsula Regional Athletic Association (ZPRA) Meet.
El inspeccion, que ya conduci de Jueves, es parte del preparacion para el benedero actividades de deportes y para asegura cay preparao ya el mga lugar donde ay esta mga atleta durante el conducida de ZPRA principiando na Abril 21 hasta 27 aqui na ciudad.
Si Dr. Cecil Atilano, el hefe de oficina de deportes de ciudad, ya habla del Viernes cay nueve escuelas publicas de elementaria y segundaria locao dentro de siete kilometros del ciudad amo ay servi como dormitorio del mga atletas y oficial tecnico durante el ZPRA.
El mga escuelas amo el mga siguientes: Baliwasan Central School; Baliawasan Senior High School-Stand along; Canelar Integrated School; San Roque Elementary School; Don Pablo Lorenzo Memorial High School; Sta. Maria Central School SPED Center; Tetuan Central School; Zamboanga City High School-Main; and, Zamboanga Central School.
El inspeccion ya dale importancia na servicio de agua, coriente, estado de facilidades y estracturas que ta inclui el escusao, clinica y otros pa hasta el seguridad para asegura el proteccion del mga participantes del ZPRAA.
Mas del 8,000 atletas desde ocho delegaciones na region hay compete para el titulo na mas de 25 eventos de deportes durante el ZPRAA que hay conduci aqui na ciudad de Zamboanga. (B. Garcia)