Nueve miembros del Dawlah Islamiya-Maute Group (DI-MG) el ya muri y cuatro soldao ya iri na serie de tirahan na provincia del Lanao del Sur.
Asegun con el 1st Infantry Division (ID), tres del nueve muerto DI-MG el directamente responsable na December 3, 2023 rebentada de bomba na Dimaporo gymnasium del Mindanao State University na ciudad de Marawi que ya resulta na muerte del cuatro personas y mas de 40 otros ya iri.
Asegun con el 1ID, el serie de tirahan ya ocuri desde dia de Jueves hasta Viernes na municipio del Piagapo provincia del Lanao del Sur.
El tropas del 1ID ya recubri mga armas de fuego de alta calibre compuesto de tres rifles M14, un rifle Bushmaster, dos rifles baby M16, un M203 grenade launcher, un rifle M653, y un rifle R4.
Asegun con el 1ID, con el mga irido soldao ya lleva na Amai Pakpak Medical Center na ciudad de Marawi para el tratamiento medical. Todo sila mga tropas bajo mando del 103rd Infantry Brigade.
Asegun con el 1ID, el serie de tirahan ya ocuri cuando ya conduci ofensiva el fuerza militar contra con el mga terorista DI-MG na provincia del Lanao del Sur.
Si Brigadier General Yegor Rey Barroquillo, el comandante del 103rd Infantry Brigade, ya reitera su compromiso para eradica con el terorismo na Lanao del Sur y lleva con el mga echor del bombardeo na justicia.
Si Barroquillo ya comenda con el coraje y determinacion del su personajes, enfatizando el inquebrantable dedicacion para servi y proteje con el mga residentes del provincia. (B. Garcia, photo courtesy of 103rd Infantry Brigade)