El govierno local ta persigue el distribucion del incentivo de dinero con mga ciudadanos de bejes en linea con el promesa del govierno local para suporta y ayuda canila como un reconosimiento na de ila contribucion con el ciudad y nacion.
Total de 88 ciudadanos de bejes el ya recivi de ila incentivo del Miercoles que ya hace na “covered court” del “Sta. Maria Central School”.
Asegun con Edna Sumergico, el asistente ejecutiva, aquellos quien ya recivi incentivo amo mga ciudadanos de bejes ta queda na mga barrio bajo el “field office 3” del Oficina de Bienestar y Desarollo Social de la Ciudad o “City Social Welfare and Development Office”.
El mga barrio bajo del Field Office 3 amo el mga siguientes: Sta. Maria; Tumaga; Pasonanca; Dulian; Camino Nuevo; Canelar; Cabatangan; Calarian; San Roque; Malagutay; y, Capisan.
Na total de 88 beneficiaros, 70 de ila mga octogenarios (80-89 el edad) y 18 mga nonagenarios (90-99 el edad). Cada uno del mga octogenarios ya recivi P10,000 y mga nonagenarios P20,000 cada uno.
El dalida del incentivo de dinero de conformidad na Ordinanza 539 del ciudad.
Mientras tanto, si Sumergico, por parte del Alcalde John Dalipe, ya supervisa tamen el distribucion del incentivo de dinero na mga residencias de aquellos quien no puede mas personalmente anda na covered court del Sta. Maria Central School para recivi de ila beneficio. (B. Garcia, photo courtesy of City Hall PIO)
