Seis miembros del grupo Abu Sayyaf el ya rendi na autoridad na provincial del Sulu, asegun con el militar del Jueves.
Asegun con Brigadier General Giovani Franza, el comandante del 1102nd Infantry Brigade, el seis miembros del grupo Abu Sayyaf ya rendi del Lunes na su quartel na Barangay Tandu-Bato, Luuk, Sulu.
Asegun con Franza, el mga rendidores ya entrega cuatro armas de fuego compuesto de un rifle Garand, dos calibre .45 pistola, y un calibre .38 revolver.
Asegun con Franza, el mga rendidores ya recivi inicial ayuda desde con el Ministry of Social Services and Development-Panamao compuesto de arroz y comestibles basico.
Si Franza ya rindi gratitud con el diferente agencias de gobierno que ya ayuda facilita con el rendida del seis miembros del grupo Abu Sayyaf.
A pesar del declaracion del Septiembre 8, 2023 cay librao ya el provincia de Sulu desde el presencia y influencia del grupo Abu Sayyaf, tiene pa siembre mga miembros el ta esconde y na lista de bisiada del gobierno.
Asegun, abierto el puerta del gobierno para recivi y ayuda canila limpia de ila nombre para puede sila vivi un pacifico vida hunto con el de ila cada’y cual familia. (B. Garcia)
