Ya comenda si Major General Ignatius Patrimonio, el comandante del 11th Infantry Division (ID), con el 41st Infantry Battalion (IB) por el contribucion y acomplisimiento na ila mga mision.
Si Patrimonio ya ase el comendacion cuando ya dale le mensaje durante el celebracion del 48 años aniversario del 41IB de Viernes na quartel del batallon na Barangay Matatal, Maimbung, Sulu.
El celebracion del 48 años aniversario tiene el tema del “41IB @48: Sustaining the Partnership for Peace, Security and Development in Lupah Sug”.
Si Tiniente Coronel Ray De Lima, el comandante del 41IB, ya expresa su gratitud con mga oficiales y personajes del batallon y tambien con el de ila mga partidarios por el de ila suporta con el mando.
Si Gobernador Abdusakur Tan ya extende su sincero gratitud con el incansable suporta del 41IB na govierno del provincia de Sulu.
Si Tan ya habla cay bien grande el ayuda del 41IB, especialmente el 11ID, na transformacion del Sulu como un pacifico lugar.
Mientras tanto, asegun con De Lima parte del aniversario amo mga actividades de deportes como juego de basketball y volleyball. (B. Garcia, photo courtesy of 41IB)