Cuatro high-value targets (HVTs), incluido un miembro de grupo de sindicato de droga, el ya aresta y valor de P3.4 millon droga ilegal el ya confisca el mga autoridad na ciudad de Cotabato, asegun con el Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM) del Sabado.
Na mismo tiempo, el mga operativas del gobierno ya puede tamen salva con dos mga menor de edad hombres durante el operacon de compra busto que ya resulta na aresto del cuatro HVTs.
Asegun con Gil Cesario Castro, el director del PDEA-BARMM, con el arestao miembro de grupo de sindicato de droga ya conose como si Sampulna Mague, 52 años el edad; y el otro tres arestao suspechao como canda Tammy Mague, 23; Armran Engga, 19; y si Noraida Solaiman.
Asegun con Castro, con el mga suspechao ya aresta na un operacion de compra busto na calle del Suraik Macmud, canto del extension del Almonte, Barangay Poblacion 2, ciudad de Cotabato, del Jueves.
Si Castro ya habla, si Sampulna es un notorioso vendedor de droga ilegal y su vendida ta conduci le ng mga sercanos provincias del BARMM, ciudad de Cotabato, y hasta na ciudad de Davao.
Asegun con Castro, con Sampulna ya aresta ya del año 2013 na Makilala, Norte Cotabato por causa na vendida de droga ilegal.
Durante el aresto del cuatro suspechao, ya confisca na de ila posesion 500 gramos de suspechao shabu enpaquetao na 13 transparente sobrecitos que tiene el valor de P3.5 millones, dinero de compra busto, cuatro celpons, varias parafernales del droga ilegal, y diferente clase de certificos de votante.
Con el cuatro arestao HVTs ya detene na carcel del PDEA-BARMM mientras con el dos menor de edad ya entrga na Departamento de Servicio de Bienestar y Desarollo.
Asegun con Castro el exitoso compra busto ya conduci mga personajes del PDEA-BARMM con el suporta del policia. (B. Garcia)
