El mga autoridad del Pilipinas ya aresta con cuatro fugitivo desde Malaysia na sur parte de pais, asegun con el policia del Lunes.
Asegun con el Police Regional Office-Bangsamoro Autonomous Region (PRO-BAR), el cuatro fugitivo desde Kota Konabalu, Sabah, Malaysia, ya aresta del Sabado na isla de Langaan na municipio de Turtle Islands, Tawi-Tawi.
Nohay mas nombra el PRO-BAR con cuatro fugitivo con quien ya puede aresta despues que ya notifica el alcalde del municipio de Turtle Islands con el policia base na informacion ya obtene el oficial desde’l policia de Sabah, Malaysia sobre el escapada del mga fugitivo para Tawi-Tawi.
El cuatro fugitivo ya escapa usando un arkilao lancha rapida desde Kota Kinabalu pasando na Sandakan, Sabah para na municipio de Turtle Islands, Tawi-Tawi.
Con el cuatro fugitivo ya pone bajo’l custodia del policia na municipio del Turtle Islands para el propio disposicion.
Si Police Brigadier General Allan Nobleza, el PRO-BAR director, ya comenda con el policia del Turtle Islands por el de ila enseguidas accion que ya resulta na aresto de cuatro fugitivo.
Asegun con Nobleza, el buen resulta del operacion ta dale mira un mafuerza mensaje con mga criminal cay mga agencias ta enforsa leyes ta trabaja junto para proteje con mga Filipinos. (B. Garcia, photo courtesy of PRO-BAR)