Cuatro personas el ya aresta mga autoridad na un campaña contra juego ilegal aqui na ciudad, asegun con el policia local del Lunes.
El policia local ya nombra con el mga arestao personas como canda Jimmy Sarmiento, 59 años el edad; Ronel Sanchez, 18; Carmilito Canoy, 51; y, si Emmanuel Palasi, 47.
Asegun con el policia local, ya aresta canila na un campaña contra juego ilegal conosido como el tarian mga alas 11:05 de Domingo aga na Sitio Asinan, Barangay Talon-Talon, en este ciudad.
El policia ya habla, ya puede confisca durante el campaña contra juego ilegal un gallo con nabaja, un talunan con nabaja, dos otro nabaja, y P400 sen de apuesta.
Con el mga arestao personas y mga cosas ya confisca na tarian ya lleva na Zamboanga City Police Station 6 para el propio disposicion. (B. Garcia)