Zamboanga: 4 arestao na bungcada de cuarto de droga illegal

0
7
photo courtesy of PDEA-9

Cuatro personas, incluido un menor de edad, el ya aresta na implementacion de orden de buscada que ya resulta na bungcada del un cuarto de droga ilegal na provincia del Zamboanga Sibugay, asegun con el Philippine Drug Enforcement Agency (PDEA) del Martes.

Asegun con Maharani Gadaoni-Tosoc, el director regional del PDEA, con el mga arestao suspechao ya conoce como canda Kent Archie Paul Javier Sala alias Cristian Javier, 18 años el edad; Jeffey Eborde Castillo, 30; y si Ryan Sanchez Jimenez, 41, todo mga residentes del Barangay Veterans Village, Ipil, Zamboanga Sibugay.

Si Gadaoni-Tosoc nohay nombra con el aka-cuatro arestao suspechao, quien un menor de edad y residente del Barangay Santa Clara, Naga, Zamboanga Sibugay.

Asegun con Gadaoni-Tosoc, con el mga suspechao ya aresta durante el implementacion de un orden de buscada que ya resulta na bungcada del un cuarto de droga illegal mga alas 6:30 del Domingo denoche na Barangay Veterans Village, Ipil.

Si Gadaoni-Tosoc ya habla, ya confisca durante el implementacion del orden de buscada 12 gramos de suspechao shabu que tiene el valor de P81,600, un celpon, y mga parafernales de droga illegal.

Asegun con Gadaoni-Tosoc, caso por violacion de Secciones 6, 7, 11, y 12, Articulo II del Ley de Republica Numero 9165 ay planta contra con el tres del cuatro arestao suspechao quien na legal el mga edad.

Con el arestao suspechao menor de edad ya entrega na custodia del Oficina Municipal de Bienestar y Desarollo Social del Naga, Zamboanga Sibugay. (B. Garcia)

Leave a Reply