Tres miembros del Dawlah Islamiya-Maute Group (DI-MG) el ya rendi con mga autoridad na provincia del Lanao del Sur, asegun con el militar del Viernes.
El 64th Infantry Battalion (64IB) nohay identifica con el tres rendidores DI-MG puera de habla’r mga siguidores sila de canda Abu Zacharia y Abu Dar.
El tres miembros de DI-MG ya rendi del Martes con Teniente Coronel Abel Potutan, el comandante del 64IB, na cuartel del batallon na Barangay Matalin, Malabang, Lanao del Sur.
El 64IB ya habla, el tres ya rendi por medio del esfuerzos diligente que ya encabesa si First Lieutenant Fernan Balala, el comandante del Bravo Company del batallon, en colaboracion con el Sultan de Marogong.
El 64IB ya habla, el tres rendidores DI-MG ya entrega un rifle Garand, y dos calibre .45 pistola con mga bala, un granada, y un bala de Rocket-Propelled Grenade.
“El tres miembros del DI-MG ya escuji rendi, realizando cay ya queda sila engañao del un ideologia destructivo y expresando un sincero deseo para abraza una vida de paz y normalidad una vez mas,” el 64IB ya habla na un anuncio.
“El de ila acto voluintario ta significa esperanza y el potencial por un futuro mejor para de ila cuerpo y el comunidades que alguna vez ya pone sila en peligro,” el 64IB ya omenta.
Ademas, asegun con el 64IB, este momento historico ta encarna el potencial transformador de comunicacion constructivo, formenta un conducivo medio ambiente para el reasimilacion del excombatientes en su comunidades. (B. Garcia)