Zamboanga: 3 arestao, P13.9 millon shabu ya confisca na un operacion de compra busto

0
7
photo courtesy of APC-WM

Tres personas el ya aresta y valor de P13.9 millon droga illegal el ya confisca mga autoridad na un operacion contra droga na Norte Cotabato, asegun con el Area Police Command-Western Mindanao (APC-WM) del Domingo.

Asegun con el APC-WM, con el mga arestao suspechao ya conoce como el mga siguientes: alias Bai, 45 año el edad y residente del Barangay Tetuan, ciudad de Zamboanga; alias Ridz, 38, y residente de Barangay Suba-Suba, Pandami, Sulu; y el tersero suspechao nombra tamen como si alias Bai, 36, y residente de Barangay San Roque, ciudad de Zamboanga.

Asegun con el APC-WM, con el tres suspechao ya aresta na un operacion de compra busto del Martes na un hotel na Barangay Balogo, Pigcawayan, Norte Cotabato.

El APC-WM ya habla, ya confisca na posesion del tres arestao suspechao dos kilos y 50 gramos de suspechao shabu que tiene el valor de P13.9 millon, un .9-milimetro pistola, tres celpon, un vehiculo, un balutan de boodle money que ya pone insima un real P1,000 como markao dinero.

Asegun con el APC-WM, ya detene con el tres suspechao en preparacion para el plantada del caso contra canila por violation del Ley Integral de Drogas Peligrosas de 2002. (B. Garcia)

Leave a Reply