Tres personas incluwido na “watchlist” el ya aresta el pulisiya local na separao campanya contra droga ilegal aqui na ciudad de Zamboanga.
El pulisiya local ya nombra con el mga arestao suspechao como el siguientes: Pony Ramos, 59; Marvin Sebastian, 36; y si Arrafie Abdurajik, 33 años el edad.
Asegun con Police Major Melvin Solmayor, hefe del Zamboanga City Police Station 2, cay con Ramos, un chuffer, ya aresta na un “buy-bust operation” mga alas 5:59 del tarde del Miyercoles na Barangay Tugbungan, este ciudad.
Asegun con Solmayor ya puede recubri na posesion de Ramos valor de P3,400 suspechao shabu y P200 markao sen.
Si Police Major Alvin Lepiten, el hefe del Zamboanga City Police Station 8, ya habla cay con Sebastian, sin trabajo, ya aresta na un buy-bust operation mga alas 8:15 del noche del Miyercoles na Teresita Drive, Barangay San Roque, este ciudad.
Ya puede confisca na posesion de Sebastian suspechao shabu enpaketao na siete diutay pakete de plastic que tiene el estimao valor de P4,000 y P200 markao sen.
Asegun con Police Major Ramon Aquitan, el hefe del Zamboanga City Police Station 10, cay con Abdurajik, un fescador, ya aresta mga alas 11:09 del Miyercoles denoche na Purok 1, Barangay Labuan, este ciudad.
Si Aquiatan ya habla cay ya puede confisca na posesion del Abdurajik valor de P8,160 suspechao shabu, un pitaka, y P200 markao sen.
Ya detene con el tres arestao suspechao myentras ta prepara el mga necesaryo documnetos para el plantada del formal asunto encontra canila. (B. Garcia, photo Courtesy of ZCPS10)