Veinte uno maga bandido Abu Sayyaf el ya rindi con maga autoridad na provincia de Sulu que ta indica otro ya tamen victoria del govierno na campaña contra terorismo.
Asegun con Coronel Richard Verceles, el operations chief of the Area Police Command-Western Mindanao, cay el veinte uno bandido Abu Sayyaf ya rindi del Miyercoles na Campo Coronel Julasirim Kasim na Barangay Asturias, Jolo, el cabisera del provincia de Sulu.
Asegun con Verceles cay con el maga bandido quein ya rindi formalmente ya recivi si Heneral Edgar Alan Okubo, el hefe del Philippine National Police-Special Action Force (PNP-SAF), durante un ceremonya ya ase na quartel del 7th Special Action Battalion na Campo Kasim.
El rindida del veinte uno bandido Abu Sayyaf, quien ta esta na diferente municipio na Sulu, ya facilita el combinao fuersa el pulisiya y militar.
Asegon con Verceles con el veinte uno bandido Abu Sayyaf quein ya rindi ya pone bajo el orientacion en preparacion para el de ila reintegracion na sociedad.
(B. Garcia, photo courtesy of Area Police Command – Western Mindanao)
