El Alcalde John Dalipe ya anuncia cay implementacion de maga proyectos de infrastraktura el prioridad del su administracion este año, dos mil veinte tres.
Asegun con Dalipe el maga proyectos ay incluwi maga abrida de nuevo camino para afloja el situacion de trafico para andada y estaba na pueblo.
Si Dalipe ya habla cay necesita abre maga nuevo camino para solve el problema de trafico cay ta omenta el numero del maga vehiculo cada año.
Asegun con Dalipe cay el otro proyectos ay implementa si administracion ta incluwi el transferida del aeropuerto internacional de Zamboanga y el City Hall para na otro lugar.
Ya habla el alcalde cay prioridad tamen de suyu el transferida de aeropuerto como suporta con el de suyu hermano mayor, el Congresista Jose Manuel Dalipe del Segundo distrito, quine ya puede ya adqueri fondo para el proyecto desde’l govierno nacional.
Con el aeropuerto esperansao transferi para na barangay de Mercedes, Zambowood and Talabaan. Del otro año, ya puede ya compra mucho lote na Mercedes el govierno para onde construji con el aeropuerto.
Asegun con Dalipe cay bajo ya na estudio el transferida del City Hall para na otro lugar para afloja con el trafico na pueblo.
(B. Garcia, photo courtesy from Mayor John Dalipe Facebook Page)